Ser lector competente é imprescindible na actualidade para satisfacer necesidades persoais, actuar como cidadáns responsables, alcanzar os obxectivos académicos, lograr a cualificación profesional e seguir aprendendo ao longo da vida.
A competencia lectora inclúe destrezas moi complexas que ata hai varias décadas eran logradas unicamente por unha minoría da poboación e que na actualidade constitúen un obxectivo básico en todos os niveis escolares. A magnitude deste obxectivo incita a promover, nos centros, plans de lectura que impliquen a toda a comunidade educativa.
Este libro está concibido como unha axuda para elaborar e poñer en marcha os plans de lectura nos centros escolares: defínese o marco conceptual no que se pode basear o plan, danse criterios para analizar o marco contextual ao que se han de adecuar as accións programadas, descríbense estas accións e proporciónanse criterios e medios para a súa avaliación.